Ціханоўская — пра вынікі дыялогу з прадстаўнікамі G7: «Свабодны свет нас падтрымлівае»

Святлана Ціханоўская прыцягнула ўвагу вядучых палітыкаў свету — Энтані Блінкена, Аналены Бербак, Дэвіда Кэмерана, Стэфана Сэжурнэ, Мэлані Жалі, Жазэпа Барэля, Антоніо Таяні — да гуманітарнага крызісу ў нашай краіне і яе паўзучай акупацыі Расіяй, паведамляе прэс-служба лідаркі беларускіх дэмсілаў.

Яна заклікала ўдзельнікаў да пошуку шляхоў вызвалення і рэабілітацыі палітвязняў.

На саміце Святлана Ціханоўская заклікала міністраў працягваць падтрымку нашай грамадзянскай супольнасці і медыя, а таксама распавяла пра палітзняволеных:

— Нашыя людзі паміраюць у турмах. Мы гаварылі пра прыцягненне рэжыму да адказнасці — не толькі за вайну супраць Украіны, але і за рэпрэсіі супраць беларусаў.

Таксама лідарка дэмсілаў адзначыла, што ў гэтыя дні прымаецца важнае рашэнне аб дапамозе Украіне:

— І я спадзяюся, што яно будзе прынятае. Бо лёсы нашых краінаў узаемазвязаныя.

Ціханоўская выказала падзяку ўсім беларусам, якія працягваюць змагацца за перамены ў нашай краіне.

— Ведайце, свабодны свет нас падтрымлівае. А я буду рабіць усё магчымае, каб пытанне Беларусі не сыходзіла з міжнароднага парадку дня.