Непатрэбнае “Роднае слова”
Міхась Шавыркін больш не ўзначальвае часопіс “Роднае слова”. Аб гэтым калектыў рэдакцыі даведаўся ад дарадцы міністра адукацыі па сувязях са СМІ Віктара Іўчанкава. Звальненне Міхася Шавыркіна з пасады рэдактара ў Міністэрстве адукацыі патлумачылі няздольнасцю часопіса вытрымліваць канкурэнцыю. “Салідарнасць” выясвятліла, што за афіцыйнай фармулёўкай звальнення “па згодзе бакоў” крыюцца і іншыя матывы.
— Рэдактар сам напісаў заяву, — адзначыў Віктар Іўчанкаў. — На працягу апошніх двух гадоў наклад “Роднага слова” падаў. Думаю, гэта звязана са зместавым напаўненнем часопіса. Да прыкладу, часопіс “Беларуская мова і літаратура” друкуе тое, што патрэбна настаўнікам: навуковыя распрацоўкі ўрокаў, метадычныя парады. Вось настаўнікі і аддаюць перавагу яму, а “Роднае слова” стала непатрэбным. Думаю, што хутка гэтыя два часопісы будуць аб’яднаны ў адзін.
Сам Міхась Шавыркін таксама лічыць, што прапанова пакінуць пасаду рэдактара звязана са “зместавым напаўненнем часопіса” — тут друкуюцца аўтары, якія апошнім часам не ў пашане ў беларускіх уладаў.
— Мы друкуем матэрыялы па тых пісьменіках, якія ёсць у школьных праграмах, — сцвярджае Міхась Шавыркін. — Гэта выдатныя майстры беларускай літаратуры. Мы ў палітыку не лезлі. Для нас галоўнае, каб аўтар быў сапраўдным пісьменнікам, паэтам, каб ягоныя творы ўяўлялі ўзор сапраўднага майстэрства.
На думку Міхася Шавыркіна, “Беларуская мова і літаратура” і “Роднае слова” — два зусім розных часопіса.
— Мы не канкурэнты, — упэўнены былы рэдактар. — Наш часопіс працуе на асобу настаўніка і вучня, на выхаванне патрыётаў, працаўнікоў, на захаванне сямейных каштоўнасцяў. Часопіс “Беларуская мова і літаратура” скіраваны выключна на тое, як арганізаваць заняткі па беларускай мове і літаратуры, там друкуюцца навукова-метадычныя распрацоўкі. Тое, што наклад “Роднага слова” падае не наша віна, а наша бяда. Чаго можна чакаць, калі нават з вуснаў кіраўнікоў мы ніколі не чуем беларускай мовы?
Паэт Генадзь Бураўкін бачыць звальненне Міхася Шавыркіна з пасады рэдактара яшчэ адным крокам у мэтанакіраваным наступе ўладаў на беларускую мову.
— Бясспрэчна, Міхася звольнілі з пасады за тое, што ён вельмі аддана і шчыра вёў беларускую справу. Да таго ж рабіў гэта надзвычай прафесійна, — адзначае Бураўкін. — Міністэрства адукацыі чарговы раз пацвердзіла сваю лінію на звужэнне ўжывання беларускай мовы. Чыноўнікі імкнуцца адправіць ў небыццё выдатных пісьменнікаў, зрабіць выгляд, што іх не існуе.
Міхась Шавыркін, які 19 гадоў быў галоўным рэдактарам часопісу ад самага моманту яго заснавання, застанецца працаваць у рэдакцыі. Цяпер ён ўзначальвае аддзел беларускага мовазнаўства і методыкі выкладання беларускай мовы. Выканаўцай абавязкаў галоўнага рэдактара часопіса прызначана Ларыса Сагановіч.
Оцените статью
1 2 3 4 5Читайте еще
Избранное