Дзяржаўныя медыі “працавалі” толькі на бацьку
Сёння, 10 сакавіка, Беларуская асацыяцыя журналістаў распаўсюдзіла чарговы маніторынг сродкаў масавай інфармацыі “Асвятленне прэзідэнцкіх выбараў 2006 года у беларускіх медыях”. У справаздачы падсумоўваецца, як рэпрэзентаваліся ў электронных і друкаваных СМІ кандыдаты і асвятляліся іх выбарчыя кампаніі ў перыяд з 21 лютага па 5 сакавіка.
Як канстатавалі эксперты, час, які прызначыў для выступаў
кандыдатаў у прэзідэнты Цэнтрвыбаркам не спрыяў таму, каб значная колькасць
выбаршчыкаў змагла пазнаёміцца з іх праграмамі. Да таго ж тэлевыступ Аляксандра
Казуліна быў скарочаны на 1 хв. 20 сек, радыёвыступ Аляксандра Мілінкевіча — на
58 сек. Кандыдат Лукашэнка, у сваю чаргу, ад выступаў адмовіўся. Замест аднаго
з іх Першы нацыянальны канал зрабіў паўторную трансляцыю фільма “Теория
заговора. Управляемый хаос” (21.02.2006), у якім беларуская апазіцыя і яе
лідэры былі рэпрэзентаваныя ў надзвычай адмоўным святле. Разам з тым, 2
сакавіка тры гадзіны ў наўпроставым эфіры ўсіх дзяржаўных тэле і радыёканалаў
доўжылася прамова Лукашэнкі на Трэцім Усебеларускім народным сходзе. Пазней яна
паўтаралася ў напалову скарочаным варыянце ў прайм-тайм падчас выхаду ў эфір
праграм навінаў. У той жа дзень у газетах “Советская Белоруссия” і “Звязда” на
першых палосах з вялізнымі фотаздымкамі была надукаваная перадвыбарчая праграма
Лукашэнкі, якая ўтрымлівала аднолькавыя палажэнні з тымі, што прагучалі ў
тэлевыступе. Для параўнання, 7 сакавіка “СБ” надрукавала праграмы Сяргея
Гайдукевіча і Аляксандра Казуліна на 14 і 15 палосах з “пашпартнымі”
фотаздымкамі.
Перадвыбарчую дзейнасць альтэрнатыўных кандыдатаў
праігнаравалі і дзяржаўныя друкаваныя СМІ. У гэты перыяд “Звязда” нічога не
пісала пра Гайдукевіча, Казуліну дасталася 0,02%, Мілінкевічу — 0,03%
(Лукашэнку ж 30,86 % параўнальна з астатнімі суб’ектамі маніторынгу).
Недзяржаўныя ж газеты пісалі пра дзейнасць практычна ўсіх кандыдатаў.
“Дзяржаўныя электронныя і друкаваныя медыі фактычна
“працавалі” на карысць толькі аднаго кандыдата, рэпрэзентуючы яго станоўча ці
надзвычай станоўча. Астатнія кандыдаты характарызаваліся пераважна негатыўна ці
ніяк не характарызаваліся”, — такую выснову робіць БАЖ, падсумоўваючы вынікі
маніторынгу.
Оцените статью
1 2 3 4 5Читайте еще
Избранное