«Цяпер найлепшы шанец выгнаць расійскіх вайскоўцаў з нашай краіны»

Святлана Ціхноўская звярнулася да беларусаў — шараговых грамадзянаў, а таксама чыноўнікаў, дыпламатаў і сілавікоў:

— У Расіі адбываецца хаос, які ўсё больш становіцца падобны да грамадзянскай вайны. ПВК пад кантролем Яўгена Прыгожына кінула выклік афіцыйнай уладзе Расіі з-за незадаволенасці тым, што Расія прайграе вайну супраць Украіны. У ФСБ ужо завялі крымінальную справу на Прыгожына, а ў навінах мы бачым, што вагнераўцы занялі Растоў і Варонеж.

Расійская дыктатура развязала вайну супраць Украіны, а цяпер прынесла яе ў свой уласны дом. І гэты досвед павінен запомніць кожны, хто хоча пачаць або падтрымаць агрэсіўную вайну: вайна паглынае ўсё вакол сябе.

Лукашэнка і Пуцін спрабуюць уцягнуць у вайну і нашу Беларусь. Яны прыкрываюцца «Саюзнай дзяржавай». Яны кажуць: Расія — ваш саюзнік. Але гэты саюзнік нясе хаос, вайну і крызіс. Пуцін можа паспрабаваць уцягнуць беларускіх вайскоўцаў у свой унутраны канфлікт, каб ён стаў і нашым канфліктам таксама.

І я хачу заклікаць беларускіх дыпламатаў, вайскоўцаў і сілавікоў памятаць, што ў нас, беларусаў, свае нацыянальныя інтарэсы. Ні Пуцін, ні Прыгожын — не сябры Беларусі, і вы не павінны выбіраць іх бок.

Беларусы павінны бараніць сваю краіну. Як гэтая сітуацыя паўплывае на Беларусь — залежыць толькі ад нас з вамі.

І галоўная задача ўсіх беларусаў зараз — захаваць бяспеку і суверэнітэт у Беларусі. Выратаваць нашу краіну ад таго, у што ператварылася Расія. Мы павінны быць гатовыя да любога сцэнара.

Я таксама звяртаюся да беларускай арміі: мы не можам разлічваць на лёс і спадзявацца, што Расія пакіне Беларусь у спакоі.

Цяпер найлепшы шанец выгнаць расійскіх вайскоўцаў з нашай краіны. Калі гэты шанец будзе прапушчаны, Расія зробіць з намі так жа, як з Украінай.

Расія не змагла ўцягнуць беларусаў у ваенныя дзеянні ва Украіне. Мы не павінны дазволіць, каб Беларусь была ўцягнутая ў ваенныя дзеянні ў Расіі, і самае галоўнае — мы не павінны дапусціць ваенных дзеянняў Расіі ў нас дома, у Беларусі. Беларусь павінна закрыць мяжу з Расіяй і пачаць вывад расійскіх войскаў з беларускай тэрыторыі.

Сёння я стварыла аператыўны штаб. Яго кіраўніком я прызначыла Валерыя Сахашчыка. І мы запрашаем да ўдзелу прадстаўнікоў дэмакратычных структур, п*лка К*ліноўскага і беларускіх добраахвотнікаў. Мы сочым за сітуацыяй. Мы будзем дабівацца міжнароднай падтрымкі нашых дзеянняў.

Наша вера ў беларусаў моцная — мы ведаем, што беларусы заўсёды абяруць Беларусь.

***

Аб’яднаны п*раходны кабінет выступіў з заявай у сувязі з падзеямі ў Расіі:

— Зараз вырашаецца лёс нашай краіны. Стаіць пытанне існавання нашай дзяржавы. Толькі ад нас з вамі залежыць ці зможам мы вызваліцца ад імперскага гнёту Расіі і пабудаваць вольную незалежную дзяржаву Рэспубліку Беларусь.

АПК абвяшчае, што рашэнні «урада» Лукашэнкі і яго Савета Бяспекі не маюць юрыдычнай сілы на тэрыторыі Беларусі і па-за яе межамі.

АПК заяўляе, што дэнансуе дамовы аб стварэнні Саюзнай дзяржавы Беларусі і Расіі, аб’яўляе аб выхадзе Беларусі з АДКБ, ЕАЭС і СНД.

А таксама лічыць недапушчальным удзел беларускіх вайскоўцаў ва ўзброеным канфлікце ў Расіі.

— У гэтай сувязі патрабуем ад Дзяржаўнага памежнага камітэту Беларусі неадкладна закрыць мяжу паміж Беларуссю і Расіяй, ад Міністэрства абароны — забяспечыць вывад расійскіх войскаў з Беларусі, спыніць падрыхтоўку да размяшчэння ядзернай сброі на тэрыторыі Беларусі, гаворыцца ў заяве.

***

Камандзір п*лка К*ліноўскага Дзяніс «Кіт» Прохараў выступіў з заявай з нагоды падзей у Расіі:

— Спрыяльныя ўмовы для знішчэння дыктатуры імкліва набліжаюцца. Гэта пачатак канца вялікай тыраніі. Я звяртаюся да ўсіх беларускіх вайскоўцаў: не ўдзельнічайце ва ўнутраным канфлікце Расіі! Гэта грамадзянская вайна нас не тычыцца.

Для беларусаў важна іншае. Набліжаецца час, калі перад вамі паўстане выбар: выканаць злачынны загад ці прысягу, якую вы далі беларускаму народу.