«Час лічыцца на гадзіны». Лекары з Эўропы і ЗША зьвярнуліся да ўладаў Беларусі

Беларускія лекары, якія працуюць у ЗША і Заходняй Эўропе, зьвярнуліся з адкрытым лістом да ўладаў Беларусі ў сувязі з эпідэміяй вірусу COVID-19, паведамляе Радыё Свабода.

У лісьце лекары патрабуюць ад органаў улады ўсіх узроўняў:

Закрыць усе навучальныя і дашкольныя ўстановы для наведваньня на чатыры тыдні, з наступным працягам.

Забараніць любыя масавыя мерапрыемствы і сходы, якія не дазваляюць удзельнікам знаходзіцца на адлегласьці двух і больш мэтраў адзін ад аднаго.

Закрыць спартовыя і забаўляльныя ўстановы і прадпрыемствы грамадзкага харчаваньня, за выключэньнем дастаўкі на дом.

Рэкамэндаваць аддаленыя спосабы працы, гнуткія графікі, ініцыяваць закрыцьцё на карантын прадпрыемстваў і арганізацыяў, якія непасрэдна ня ўдзельнічаюць у жыцьцезабесьпячэньні насельніцтва.

Адразу ж забясьпечыць апавяшчэньне ўсіх групаў насельніцтва аб спосабах абароны ад інфікаваньня і абмежаваньні пашырэньня інфэкцыі, у тым ліку аб правілах паводзін пры ўсеагульным карантыне.

Забясьпечыць своечасовае інфармаваньне грамадзкасьці аб бягучай статыстыцы захворваньня і захадах барацьбы з эпідэміяй.

Забясьпечыць работнікаў мэдычных установаў і іншых службаў жыцьцезабесьпячэньня ахоўнымі сродкамі, харчаваньнем і, пры неабходнасьці, дапамогай у доглядзе дзяцей.

Адмяніць асабістую адказнасьць мэдычных работнікаў за абнародаваньне інфармацыі аб бягучым стане ў мэдычных установах.

Актыўна спрыяць узаемадзеяньню дзяржаўных установаў з грамадзкімі і валянтэрскімі арганізацыямі для выкананьня названых задачаў, а таксама для бясьпечнай дастаўкі прадуктаў харчаваньня і мэдыкамэнтаў людзям з высокай рызыкай сур’ёзных ускладненьняў (людзі, старэйшыя за 60 гадоў, з хранічнымі захворваньнямі або паніжаным імунітэтам.)

Лекары тлумачаць, чаму гэтыя захады неабходныя менавіта цяпер:

Вірус хутка распаўсюджваецца ў паўсядзённым жыцьці і перадаецца як хворымі людзьмі, так і здаровымі носьбітамі.

Досьвед іншых краін паказаў, што прамаруджваньне ва ўвядзеньні названых захадаў вядзе да масавай гібелі людзей, бо сыстэма мэдычнай дапамогі надзвычай перагружаная.

У гэтай сытуацыі непазьбежны высокі ўзровень захворвальнасьці і сьмяротнасьці сярод лекараў і мэдычнага пэрсаналу. Толькі запаволеньне распаўсюджваньня вірусу праз своечасовае сацыяльнае дыстанцыяваньне (усеагульны карантын) і ізаляцыю хворых можа дазволіць большай колькасьці пацыентаў атрымаць дапамогу і выжыць.

Пад адкрытым лістом падпісаліся лекары з ЗША: Анастасія Пігаль, Сяргей Дзедзік, Т. К., Анастасія Манькоўская, Вольга Годзіна, Вікторыя Казлоўская. Валянціна Балоціна і Крыст Хуб са Швэцыі, Дзьмітрый Кузьмін і Раман Фарнін зь Нямеччыны і Артур Мацуткевіч з Польшчы. ​

«Хвароба не выбірае людзей паводле сацыяльнага статусу ці пасады. Справіцца зь ёю можна толькі праз хуткую кансалідацыю намаганьняў усяго грамадзтва. Час лічыцца на гадзіны», — гаворыцца ў адкрытым лісьце.

Главврач минской клиники призвал людей быть дома. Почему?